கிரிஷ் நிறுவனத்தின் முன்னாள் பணிப்பாளர் சானகி சிறிவர்தன இலஞ்ச, ஊழல் ஆணைக்குழுவினால் கைது செய்யப்பட்டுள்ளதாக தகவல் வெளியாகியுள்ளது.

அந்த ஆணைக்குழுவின் (CIABOC) விசேட விசாரணைப் பிரிவு அதிகாரிகளால் அவர் இன்று (24) காலை கைது செய்யப்பட்டதாகத் தெரிவிக்கப்படுகிறது.

குறித்த நிறுவனத்திற்காக, நகர அபிவிருத்தி அதிகாரசபைக்குச் சொந்தமான கொழும்பு கோட்டை "டிரான்ஸ்வொர்க் சதுக்கம்" (Transworks Square) நிலத்தை விரைவாகப் பெற்றுக்கொள்வதற்கு உதவுவதற்காக, நாடாளுமன்ற உறுப்பினர் நாமல் ராசபக்சவுக்கு 70 மில்லியன் ரூபாயை இலஞ்சமாகக் வழங்கியதாக கூறப்படும் குற்றச்சாட்டின் பேரிலேயே இவர் கைது செய்யப்பட்டுள்ளார். இதேவேளை சானகி சிறிவர்தன இந்த 70 மில்லியன் ரூபாய் பணத்தை மூன்று தனித்தனி சந்தர்ப்பங்களில் நாமல் ராசபக்சவுக்கு வழங்கியதாகக் குற்றம் சாட்டப்பட்டுள்ளது. இந்த நிலையில் கைது செய்யப்பட்ட சந்தேகநபர் இன்று (24) நீதிமன்றத்தில் முன்னிலைப்படுத்தப்படவுள்ளதாக தெரிவிக்கப்படுகின்றமை குறிப்பிடத்தது.